Magazin

Ne dozvolite da sezona kajsija prođe: Napravite domaći liker bogate arome koji će vas i usred zime podsjećati na ljeto

Sezona kajsija traje kratko, pa mnogi upravo sada traže način da sačuvaju njihov miris i ukus i za mjesece koji dolaze. Domaći liker od kajsija jedan je od najljepših načina da "zarobite" ljeto u boci. Pravi se od nekoliko jednostavnih sastojaka, a uz malo strpljenja dobićete aromatičan napitak bogate boje i ukusa koji je odličan kao aperitiv, uz kolače ili kao poklon iz kućne radinosti.

liker od kajsije
FOTO: FREEPIK

Miris zrelih kajsija mnoge vraća u djetinjstvo i dane kada se u dvorištima sušilo voće, pekao džem ili punile flaše domaćih sokova i likera. Upravo zato ovaj recept nije samo još jedan način da iskoristite sezonsko voće, već mali ritual kojim možete da sačuvate dio ljeta i otvorite ga kada stignu hladniji dani.

Najvažnije je da izaberete potpuno zrele, ali čvrste kajsije, bez oštećenja. Što je voće kvalitetnije i mirisnije, to će i liker imati bogatiju aromu i ljepšu prirodnu boju, piše Ona.

Pročitajte još

Sastojci:

1 kg zrelih kajsija

700 ml kvalitetne lozovače ili votke (40%)

400 g šećera

1 vanilin šećer (po želji)

1 štapić cimeta ili nekoliko koštica kajsije (po želji, za intenzivniju aromu)

Priprema nije komplikovana, ali zahtijeva vrieme kako bi voće polako otpustilo svoje prirodne sokove, miris i slatkoću. Upravo to višenedjeljno odležavanje daje ovom domaćem likeru punoću ukusa zbog koje ga mnogi svake godine ponovo prave.

Priprema

Kajsije dobro operite, osušite, prepolovite i uklonite koštice.

Voće stavite u veliku staklenu teglu i prelijte rakijom ili votkom tako da bude potpuno potopljeno.

Teglu dobro zatvorite i ostavite na sunčanom ili toplom mjestu četiri do šest nedjelja. Povremeno je blago protresite.

Nakon odležavanja procedite tečnost kroz gustu gazu ili filter za kafu.

U proceđeni liker dodajte šećer i mešajte dok se potpuno ne rastvori. Po želji ubacite vanilin šećer ili štapić cimeta.

Liker sipajte u čiste staklene boce i ostavite da odstoji još najmanje dvije do četiri nedjelje na hladnom i tamnom mjestu kako bi se ukusi potpuno sjedinili.

Iako će mnogi poželeti da ga probaju odmah, iskusni domaćini kažu da se strpljenje u ovom slučaju zaista isplati. Poslije nekoliko nedjelja odležavanja ukusi postaju zaokruženiji, miris intenzivniji, a tekstura prijatno mekša.

Ako više volite blaži i manje sladak liker, količinu šećera možete smanjiti na oko 300 grama. Za potpuno bistar napitak preporučuje se da liker procijedite dva puta ili da ga ostavite nekoliko dana da miruje, pa ga pažljivo pretočite u boce bez taloga.

Dobro zatvoren i čuvan na hladnom i tamnom mjestu, domaći liker od kajsija može da traje duže od godinu dana. Mnogi tvrde da je čak ukusniji nakon nekoliko mjeseci odležavanja, kada se sve arome potpuno povežu.

Poslužite ga dobro rashlađenog u malim čašicama kao aperitiv, uz sitne kolače, sladoled ili voćne deserte. Jedna boca ovog domaćeg likera često postane i lijep poklon za prijatelje ili porodicu, a gotovo svako ko ga jednom napravi, narednog ljeta ponovo traži isti recept.

Bonus video